ولازم تدفعوا الديّة
ولازم تعلنوا النيّة
ولازم تعلنوها بجدّ
مين قتل الجناينيّة ؟
ولو تنطق ملامحكم ... بتخدعنا
ولو ننطق.... ما نلقى حد يسمعنا
ويوجعناالألم
والغمّ
وتقتلنا سنين الهمّ
ولون الدمّ
يادمّ الشهيد انطق
وقول للدنيا دى بحالها انك انت حىّ
وصورتك..من بعيد بتطل ع الميدان
وصوتك جىّ
فهزّ بصوتك الصدّاح ...معابدهم
وخلى حناجر الثوّار .....تعاندهم
وروّى بإيدك الطاهرة
جناين حلمنا لاخضر
واسقى بدمّك الطاهر
تراب الأرض
خلينا ندوق طعم الفراق المرّ
أكيد المية هتروّق
أكيد الحلم هيزوّق
بلون دمّك ملامحنا
ومين احنا
وإنت مين
دانا والله لو راح اموت على تراب البلد دى فداك
يكون أهون من العيشة اللى انا فيها
وبحلفلك بإنى بداية من يومى لحدّ مااموت
هصون عرضك ..واصون شرفك ..
واشيل اسمك على راسى
وهوهب قلمى لجل عنيك
وكرّاسى
وهكتب فيك لحدّ الحبر مايشطب
ومش هوفيك أكيد حقك
وحقك .........
هو إنى أموت مكان رجلك
واحط ترابك الطاهر
على راسى
واحشنى بجد.........
ورب العزة واحشنى
يا نور عينى
ياساكن جوة تكوينى
ونور عينى عشان خاطرك بجدّ يهون
وانا المسكون بأحلامك
ومش ناسى
وانا اللى غريب عشان خاطرك
مابين ناسى
وراسى فوق شطوط الهم مش خايف
أنا خايف على حلم السنين ليضيع
أنا خايف قوى لنبيع
وبين خوفى وبين همّى
أنا هسقى الوطن دمّى
ومش هبخل بعمرى الجاىّ علشانك
واسمحلى أقولهالك
وأختم بيها موالى
أنا نفسى أموت زيّك
لكنى بجدّ مش طايل
وبالرّغم انى بتحايل
......مفيش فايدة
....................................
