الــــخــــــــريــــطــــــــــــــة
بصيت فى خريطة بلدى ما لقيش الألوان
ياخبر مالوش ملامح
فين الأخضر والأزرق ولا الأصفر سيد الألوان
ياه ...السحابة السودة هى العنوان؟!
قررت أغسلها أحترت أغسلها بمسحوق للأبيض ولا ألوان
بحب اللون الأبيض لما بيغطى الميدان
وبحب الورد الملون فى الجنايين والريحان
جربت ما دفعش رشوة وأكرامية ولاحتى شاى وقهوة كمان
قولت أبدأ من البقع الصغيرة وأدعى ربنا يعنى على الحيتان
قررت أقول رأئى فى اللى وكلنها ولعة ومختفش من الغربان
أضربت على دماغى لكنى قمت زى الفرسان
قولت يساعدونى ولادى محمد وأحمد و مينا وحسان
رجعت فى كلامى وهاخد أيه من كارهين القمصان
المبدلين الياقة المنشية ببدى ضيق وبنطلون سقطان
وما تنساش الحزام أبو توكة كبيرة متعدد الألوان
يا سنة مفيهاش غم ... هما دول أمل بلدنا الغلبان
زعلوا منى وقالوا هنعمل ثورة ونريح كل تعبان
ضحكت فى نفسى وقولت خلاص قبلونى فى الميدان
سألونى الميعاد قولت التلات بعد صلاة الجمعة يا كارهين القمصان
وفى يوم التلات لقيتهم مرصوصين فى كل ميدان
فى التحرير و إبراهيم بيه والأربعين
والشون من ألفين وتمانية وقفين
جوبونى بدون ما أسألهم بصينا فى النص المليان
قلنا جايز غلط فى الميعاد لكن لله الحمد مغلطش فى العنوان
بدأناها بنتين وحفنة من الشبان والمليونية فى الآخر كانت العنوان
غسلنا الخريطة ونظفناها من الزفت والقطران
حلفنا لنعدى بيها بر الأمان ونبدل الألوان
الأزرق والأصفر والأخضر هيكون سيد الألوان
